सरकारी भूइयां मं कब्जा करे हे कोटवार ।बनवावत हे घर अउ ओढ़र करे हे कोठार।।

सरकारी भूइयां मं कब्जा करे हे कोटवार ।

बनवावत हे घर अउ ओढ़र करे हे कोठार।।

थाना ले लेके राजभवन तक आवेदक के गोहार।

कब्जा छोड़वाय बर भीड़े हे श्याम कुमार।।

गऊ चरागन ल बेजा कब्जा मुक्त बर करत हे जोहार।

एक घ पढ़बेच्च करव, मयारू भाखा समाचार ।।

    सक्ती  :--समाचार अइसे हे कि -  बरभांठा ( घोघरी )के कोटवार यादराम ह सरकारी भूइयां मं कोठार के ओढ़र करत कब्जा करके  घर कुरिया घले बनवावत हे, तेकरे खातिर श्याम कुमार चन्द्रा ह तसील मालखरौदा मं फिरियाद करे हे, जेकर मुताबिक बरभांठा के कोटवार- यादराम चौहान, संतराम चौहान अउ दसाराम चौहान पिता अघोरीराम तीनों झन सरकारी भूइयां ख.नं. १०४/२ ल पोगरिया के कोठार बनाय हें अउ येकरे भीतर मं दसाराम के ना मं घर बनावावत हे। 

   इहां के हल्का पटवारी ह मौका- जांच करके जगा- पंचनामा बनाईस अउ  तसील मालखरौदा के तहसीलदार साहेब मेर प्रतिवेदन ल जमा करीस तेकरे अधार ले तसील मालखरौदा मं श्याम कुमार चन्द्रा ह फिरियाद करे हे जेमां तसील साहेब ह घर बनाय के काम बूता ल  बंद करे बर अऊ बेजाकब्जा ल हटाय बर स्थगन-आदेश जारी करे हें ।

 जेकर प्रतिलिपि आदेश ल थाना प्रभारी डभरा अऊ हल्का पटवारी छपोरा ल घले भेजे हें, तभो ले दसाराम ह वो घर बनाय के काम बूता ल करतेच्च हे।

 येकरे बर श्याम कुमार चन्द्रा ह तसील  मालखरौदा म फेर फिरियाद करत बताइस कि स्थगन आदेश जारी होय के बाद घले घर मकान बनाय के काम बूता चलतेच्च हावव, ये मन के विरोध म कोनों अइसे कार्यवाही करना चाही कि येमन ये काम ल झन करय। 

येकरे संगे-संग वोइच् दिन यादराम के विरोध मं सरकारी करमचारी (कोटवार) होके घले सरकारी भूइयां ल बेजा कब्जा करत हे क के ओकरो बर कानूनी कार्यवाही करे खातिर फिरियाद करे हे।

   तभो ले ओ घरमकान बनाय के काम बूता ह नी रूकीस अऊ काम बूता चलतेच्च रहीस। तेकरे बर तसील मालखरौदा ले ओ मन बर न्यायालयीन आदेश के अवहेलना करइया यादराम संतराम अऊ दशाराम, तीनों भई के विरोध मं प्रतिबंधात्मक कार्यवाही करे बर ज्ञापन-आदेश जारी होइस अउ येकर जिम्मेदारी ल पूरा करे बर थाना प्रभारी डभरा ल आदेश जारी करीन कि बेजा कब्जा ल हटवा के ये तीनों अनावेदक मन बर प्रतिबंधात्मक कार्यवाही करे जाय अऊ पालन प्रतिवेदन तइयार करके हमर न्यायालय मालखरौदा मं पेश करे जाय, येकर सूचना हल्का पटवारी छपोरा ल घले भेज गिस। 

  येकरो बाद ओ अवैध घरमकान बनाय के काम बूता चलतेच्च रहीस। तभे आवेदक श्याम कुमार चन्द्रा ह  फेर कउआके ओ बेजा कब्जा ल  हटवाय बर गांव-कोटवार यादराम चौहान, संतराम चौहान अऊ दसाराम ये तीनों झन के विरोध मं उचित कानूनी कार्यवाही करवाय खातिर  अब छत्तीसगढ़ के राज्यपाल रायपुर ल अरजी आवेदन भेजे हे। 

जेकर प्रतिलिपि आवेदन

मा. मुख्यमंत्री छ.ग. शासन रायपुर, 

मा. राजस्वमंत्री छ.ग.शासन रायपुर, 

श्रीमान् संभागायुक्त 

संभाग बिलासपुर, 

श्रीमान् जिलाधीश,

जिला- जांजगीर- चांपा, 

श्रीमान् एसडीएम सक्ती, 

श्रीमान् तहसीलदार 

तहसील न्यायालय मालखरौदा,

श्रीमान् थाना प्रभारी,

पुलिस थाना डभरा ल उचित कानूनी कार्यवाही करे बर अरजी आवेदन भेजे हे।

प्रेषक - श्याम कुमार चन्द्रा।

दिनांक १२/०२/२०२२